Hjarte

Litt broderigarn til brodering.

Litt heklegarn til ein hekla kant rundt.

Og litt fyll til å ha inni.

Resultatet blei dette hjartet. Så kjekt å laga, at det kanskje blir fleire.

Ynskjer deg ei god helg :)

Pyntehandkle

Endeleg har eg fått brukt mønsteret som eg kjøpte hos Muffin. Ho er jo så flink, og teikningane hennar er ei fryd å brodera etter.

Juleduk har eg ikkje starta på enno, men eg brukte nokre av figurane og broderte eit nytt pyntehandkle til jul.

Eg valde ein av dei store englane som motiv.

Rundt stjerna var det ein strofe av ein juesong, men her syns eg det var nok med berre stjerna.

Blonden hadde eg frå før. Den har eg hekla med tynn nål for lenge sidan, og eg brukte den ei stund på nokre hyller.

Eg har brukt fleirfarga moulinegarn til broderiet, og det synest eg gav meir liv til mønsteret.

Fordi pyntehåndkleet blir bretta framover på stanga det heng på, så må det faldast frå begge sider. Då klipper eg først eit hakk der det blir lagt over. Så syr eg ein fald frå kvar si side.

Forma er ikkje på topp for tida, men med ei snill dotter som er kome heim på juleferie, ordnar det meste seg til jul.

Det har vore eit kjempekjekt bloggår, og eg vil takka for alle koselege kommentarar.

Håper de får ei fin jul alle saman. Juleklem frå Bodil :))

Pyntehandkle

Har gjort ferdig eit pyntehandkle i engelsk broderi. Det er eit gamalt mønster, som eg syntest passa godt til det.






Viser med det same eit som eg har brodert i hardangersaum.
Eg synest det er koseleg å ha pyntehandkle på kjøkkenet, og det er kjekt å brodera ulike slag. Så til jul og påske har eg pyntehandkle med jule- og påskemotiv.

Broderte putar og dukar

Kom over så snertne innerputar i ein utstyrsforretning. Det gav meg ideen til å laga desse putane. Tre av dei er brodert med kontursting/stilkesting og litt plattsaum, medan den rosa puten er brodert med mille-fleursting.Eg har brukt tre trådar moulinegarn i nåla. Sel putane for 250 kroner pr. stk. uten innerpute.














Denne firkanta duken har omtrent same mønster som puten over, men på duken er det og litt plattsaum. Den har andre blåfargar enn på puten, og blonden er og ulik. Sel den for 380 kroner.


Denne duken har og likt mønster som ein av putane, men fargane er ikkje heilt dei same. Dei har og ulik blonde. Sel den for 280 kroner.


Så over til noko heilt anna. Eg har laga meg ein spinneblogg, så viss nokon har interesse av det, er det ein link til den øverst i bloggen min.

Engelsk broderi

Her har eg brodert to putar i engelsk broderi. Det er ein gamal broderiteknikk som vart mykje brukt før. Den vart brukt mykje på putetrekk, dukar og liknande. Den består av plattsaum, knutar, kontursting eller stilkesting som det og vert kalla, og holsaum der ein først tråklar rundt holet som ein skal brodera, så klipper ein hol, og deretter syr ein rundt med tette små sting. Plattsaumen består av to lag. Først fyller ein alle blada eine vegen, så syr ein plattsaum over den andre vegen. Dermed blir plattsaumen som små opphøya "putar". Ein brukar og diverse tjukkelsar på tråden til dei ulike delane.
Har ikkje bestemt meg enno om eg skal leggja dei ut for sal, men tenkte at eg likevel kan visa dei her i bloggen.

Broderte runde dukar

To broderte dukar i ulike fargar. Den eine i mørk grøn og mørk raud, den andre i lys grøn og rosa. Pris pr. stk. er 290 kroner.