Handarbeidsglede

Strikkemappe med tilbehør

2012-01-28T17:02:00.000+01:00

Først må eg takka for alle kommentarar eg fekk på gensaren i forrige innlegg. Det var overveldande, og sjølvsagt veldig kjekt. Vi strikkemammaer likar jo godt når ungdommen vil ha heimestrikka plagg, og vi legg jo kjærleik i kvar maske :)

Så over til dagens innlegg. Eit av stoffa som eg fekk til jul, syns eg passa så godt til strikkemappe. Resultatet vart eit strikkesett, med strikkemappe, oppbevaringsmappe, og eit lite nålebrev. Eg har sett rundt om på bloggane at det er fleire som lagar nålebrev, så eg fekk inspirasjon til å laga mitt eige. Det er både lite og enkelt, og får plass i oppbevaringsmappa.

Det er god plass i strikkemappa til ti nøster, fem i kvar høgd.

Her er det plass til det viktigaste, og den har flat botn for litt betre oversikt.

Nålebrevet lukkast igjen med ein trykknapp.

Inni nålebevet strikka eg ein lapp i eit litt tynt bomullsgarn. Her kan ein festa nåler ,sikkerhetsnåler, maskemarkørar og ellers det ein har bruk for.

Her er det første nålebrevet eg laga av nokre stoffrestar. Det fekk litt broderi til pynt.

Ynskjer alle ei kreativ helg :)

Gensar med raglanfelling

2012-01-21T11:29:00.000+01:00

Eine sonen lurte på om eg ville strikka ein gensar til han, og det seier eg jo ikkje nei til. Slike oppdrag er kjekke å få, og det er nokon år sidan eg strikka gensar til han sist.

Han ville ha ein enkel gensar med berre ein mønsterbord oppe. Farge og garn tok han ut sjølv, og mønsterborden fann han i heftet Klassikere frå Sandnes garn. Han ville og ha raglanfelling.

Det var ein enkel gensar å strikka, men det vart ein del prøving og feiling i starten. Garnet eg har brukt er Smart og Juvel, og fargane er ein djup mørk blå og grå. Flotte fargar, som eg syns passa godt ilag. Gensaren er alt teken i bruk, og den er god og varm.

Ynskjer deg ei god helg :)

Nytt bloggår

2012-01-14T12:47:00.000+01:00

Godt nytt år, og velkomen til eit nytt bloggår. Det skal bli kjekt, og eg ser fram til mykje inspirasjon og besøk på mange flotte bloggar :)

Eg var så heldig å få mykje fint stoff til jul.

Fann ut at eg måtte begynna i det små, så det vart fire ting og tang/sminkevesker/pengepungar.

Med andre ord så kan dei brukast til det ein har behov for.

Alle er fora med likt stoff, og dei vil bli lagt ut på Epla etter kvart.

Her er stoffa eg fekk: Flotte julestoff.

Andre lekre stoff.

Og alle desse. Det skal bli kjekt å finna ut kva eg skal sy av dei ulike stoffa.

Ynskjer deg ei god helg :)

GOD JUL

2011-12-18T13:28:00.000+01:00

God jul, og takk for eit kjempekjekt bloggår :)

Litt førjulsstrikk

2011-12-12T18:20:00.000+01:00

Det skjer ikkje det heilt store her på handarbeidsfronten for tida.

Men innimellom juleførebuingar er det greit å ha noko enkelt å ty til.

Og litt garn til å strikka vottar av, er ikkje vanskeleg å finna.

Det vart enkle vottar, med ein brodert blomst på kvar.

Garnet er både tjukt og mjukt, og inneheld ull, polyamid og alpakka.

Alle fire para er lagt ut på Epla.

Ynskjer alle ei fin førjulsveke :)

Ambrosiabrød

2011-12-11T17:18:00.000+01:00

Ambrosiabrød er gode julebrød som det er blitt tradisjon å baka kvart år.

Dei inneheld stjerneanis og nellik som er gode julekrydder.

Her er oppskrifta:

4 dl mjølk

1 dl vatn

150 g smør

1,5 kopp (ca 2,5 dl) sukker

1 egg (kan sløyfast)

50g gjær

1 ts salt

ca 800 g (ca 14,5 dl) kveitemjøl

2 ts stjerneanis

1 ts nellik

rosiner eller korinter (kan sløyfast)

Bland saman mjølk, vatn, smør og sukker, og gje det eit oppkok. Avkjøl. Ha i gjær, og eventuelt egg. Ha i det tørre, og bland godt. Set til heving. Del deigen i tre, og bak ut runde eller avlange brød. Set til heving ein gong til. Pensle med egg eller vatn. I oppskrifta står det at dei skal steikast på 200 grader. Det er litt sterk varme for min ovn, så eg brukar å steika dei på 180-190 grader. Ca. 30 min.

Smakar nydeleg med brunost, eller anna favorittpålegg :)

Ynskjer deg ein god adventskveld :)

Strikkasett

2011-12-03T14:19:00.000+01:00

Eg har strikka eit enkelt sett til meg sjølv med hue og vottar. Oppskrifta blei til etter kvart.

Det er strikka i dobbel perlestrikk, og med dobbelt garn.

Garnet heiter Alpa, og er kjøpt på Europris. Det inneheld 15% ull, 20% alpakka, og 65% akryl. Til tross for mykje akryl, så kjennest det ikkje slik ut, og det er veldig mjukt og godt å strikka med.

Resultatet etter vask er og mjukt og godt.

Vottane er i same mønster, og det er fargen på dei øverste bileta som er den rette.

Ynskjer alle ei god adventshelg :)

For den miljøbevisste

2011-11-26T13:24:00.000+01:00

Tusen takk for positiv respons på dei første korthaldarane som eg laga :) No er julekartongane kome i butikkane, og som alltid er det koselege bilete av diverse nissar utanpå. Då er det kjekt å laga korthaldar med julemotiv.

Her er det nissemor som strevar til jul, og har hatt eit "lite" uhell med strykejernet :)

Det er to lommar i desse korthaldarane, og dei er ca 9,5x7 cm.

Kanskje ei smart gåve til den miljøbevisste :)

Eller kva med ein nøkkelholsmerka Skyr mysli.

Det fins mange variantar.

Og desse som er på langs, er laga av 1,5 literskartongar. Det er to rom i dei og, og er ca like store som dei andre.

Nokre av dei blir lagt ut på Epla etter kvart.

Tusen takk for alle kjekke kommentarar, og ei god adventshelg til dykk alle :)

Sying igjen

2011-11-19T13:38:00.000+01:00

Det er kjekt å sy, men det er litt enklare å setja seg ned med eit strikk. Kanskje fordi det alltid ligg klart, men skal ein sy, så er det litt meir ting og tang som må leitast fram.

Denne gongen er det blitt to litt store sminkevesker i skinn.

Den eine har eg pynta med ei remse av lin.

Den andre utan pynt.

Dei kan vel og brukast som selskapsveske/clutch, her med pyntepuls av sjølvspunne garn.

Her ein anna pyntepuls utan blomst, og med garn som eg har spunne her og.

Så har eg sydd fire små lommebøker/sminkepung/ting og tangpungar.

Det meste av dette vil du etter kvart finna på Epla.

God helg, og takk for din kommentar :)

.

Juleposar

2011-11-12T10:57:00.000+01:00

Egentleg tenkte eg på desse posane som juleposar, men fargane er vel slik at dei i grunnen kan brukast heile året.

Det er god plass i dei til diverse sunt og godt, eller ting og tang .

Så fann eg litt smårestar av julestoff frå ein del år tilbake. Litt av det vart til desse to posane.

Og denne resten var akkurat stor nok til ein lyspose.

God helg, og takk for at du tittar innom bloggen min :)

Småstrikk

2011-11-05T11:41:00.000+01:00

Av diverse smånøster har eg strikka litt småting.

Det vart 4 par med jentepuls.

Dei er strikka i dobbel perlestrikk, og med dobbel tråd.

Ein enkel heklekant pyntar opp framme.

Så vart det to par lestar av ein rest med Labbetussgarn.

Og til slutt to isskrapevottar.

Det meste av dette vil etterkvart bli lagt ut på Epla.

Ei god helg til deg som er innom bloggen min. Så kjekt at du tek deg tid til det :)

Litt juleting

2011-10-27T19:41:00.001+02:00

Jula nærmar seg, og det er kjekt å laga litt juleting.

Desse putane kan brukast på begge sider, og det er omvendte fargar.

Eg har vist dei i bloggen før i andre fargekombinasjonar.

Her er ein i svart og kvitt.

Det er koselege putar å hekla, og kjekt å variera med ulike fargar.

Og klutar i julefargar er ein koseleg fargeklatt på kjøkkenet til jul.

Dette finn nok vegen til Epla i løpet av helga.

Tusen takk for mange kjekke kommentarar, og ha ei flott helg :)

Gjenbruk

2011-10-21T19:08:00.000+02:00

Gjenbruk er i vinden som aldri før, og det er spennande og inspirerande å sjå alt som blir laga.

Dei fleste i bloggverda har vel sett Ingrid Riddervold sine geniale kartonglommebøker. Viss ikkje, finn du bloggen hennar her. Ho er ein meister på gjenbruk, og det er ei fryd å sjå alt ho lagar.

Inspirert av kartonglommebøkene hennar, har eg brukt same materialet, men laga korthaldar av kartongen i staden. Det har vore mykje prøving og feiling før eg kom fram til dette resultatet.

Her kan du få korthaldar på nynorsk.

Eller kva med Tine sin Ananasjuice.

Det er to lommer inni, med plass til kort i kvar lomme.

Dei blir lukka med ein trykknapp.

Her er ein som er laga andre vegen, med korta på langs.

Kanskje nokre av dei finn vegen til Epla etter kvart.

Ha ei flott helg :)

Lommebok/sminkepung i skinn

2011-10-15T14:09:00.001+02:00

Av diverse skinnrestar har eg sydd 4 lommebøker/sminkepungar.

Dei kan sjølvsagt brukast til anna ting og tang og.

Alle er fora, og har ei tynn skinnsnor i glidelåsen.

Foret er gjenbruksstoff, og eg har brukt vliselin mellom laga.

Dei vil etterkvart bli lagt ut på Epla.

God helg :)

Strikking igjen

2011-10-07T20:04:00.000+02:00

Hausten er komen, og behovet for vottar er her allerede.

Eg hadde fire nøster med Fritidsgarn, som rakk til desse tre par vottane. Dei fekk seg ein runde på finvask for lettare toving.

Så hadde eg to like nøster med Smart. Dei vart til desse to para.

Og til slutt, to isskrapevottar.

Alle er lagt ut på Epla.

God helg :)

Kjekt å sy.

2011-10-02T10:31:00.001+02:00

Slike posar er veldig kjekke å sy, og kan brukast til oppbevaring av ting og tang både på kjøkken, bad, og ellers i huset.

Dette vart ein pose som kan brukast til diverse brødvarer, samtidig som den pyntar opp på bordet.

Koseleg stoff, som er kjøpt hos Panduro.

Posane blir jo veldig ulike, alt etter kva stoff ein brukar.

Denne er sydd av gjenbruksstoff.

To av dei blir lagt ut på Epla.

Her ser det ut som det blir ein nydeleg søndag. Håper du og får ein flott dag :)

Endå meir sying.

2011-09-24T11:25:00.000+02:00

Her går det framleis i sying av diverse ting og tang. Nokon av stoffa er nye, noko er restar, og noko er gjenbruk. Desse posane har eg sydd på ein litt anna måte enn dei eg har laga før. Du finn ein smart framgongsmåte i Timotei sin blogg.

Denne posen er sydd av gjenbruksstoff. Foret er av 100% lin, og har levd sitt tidlegare liv som bukse. Stoffet utanpå, har vore ein bluse.

Denne er sydd av ein dongerirest, og fora med eit av stoffa som eg vann hos Bentes Quiltehage.

Nydeleg for, som eg syns passa godt til dette stoffet.

Her er eit litt lysare dongeristoff, og her vart det ei remse med same stoff utanpå.

Og likt for inni.

Dette stoffet likar eg så godt, så det kjøper eg kanskje meir av.

Og her har eg brukt eit anna av stoffa som eg vann i Bentes Quiltehage, så no har eg snart ikkje meir igjen av dei.

Nokon av desse tinga blir lagt ut på Epla etter kvart.

God helg, og tusen takk for alle kjekke kommentarar :)

Litt meir sying

2011-09-17T17:04:00.001+02:00

Eg er framleis inspirert av flinke sydamer her i bloggverda, og har sydd litt til.

Desse kan vel brukast til litt av kvart, alt etter behov, og denne er allerede gitt bort i gåve.

Likte godt dette stoffet som eg kjøpte på den lokale sybutikken.

Dette er eit stoff som eg fann i ei restekasse hos Panduro ein gong.

Alle er fora, og har eit lag med vatt eller strykevliselin.

Denne er sydd av ein liten rest som eg hadde, og er allerede tatt i bruk til diverse ting og tang.

Dersom du lurer på korelis ein syr desse, så finn du ei god veiledning på lises myke pakker sin blogg.

God helg :)

Fargeklattar til kjøkkenet

2011-09-10T09:49:00.000+02:00

Innimellom andre handarbeidssyslar, er det greit å ha det litt enkle å ty til.

Og ein ny fargeklatt til kjøkkenet friskar opp no om hausten.

Dette er luftige og gode klutar som tørkar raskare etter bruk. Du kan lesa meir om dei i dette innlegget.

Dei blir etter kvart lagt ut på Epla

Tusen takk alle bloggvener for kjekke kommentarar som eg får. Dei blir sett stor pris på :) Velkomen og til nye som føl bloggen min :)

Elles ser det ut som vi får ein strålande dag i dag, med sol frå skyfri himmel :) Det er lenge sidan vi har hatt, så det skal bli godt :)

God helg :)

.

Fleire vottar

2011-09-04T12:05:00.000+02:00

Det er blitt to par vottar til med dette mønsteret.

Det er eit kjekt og enkelt mønster å strikka, og ein fin måte å få brukt litt restegarn.

Dei er strikka i sokkegarn, så det er slitesteke vottar som tåler å bli brukt.

Begge para er lagt ut på Epla.

Ynskjer alle ein god søndag :)

Strikkeveske

2011-08-28T13:05:00.001+02:00

Etter mykje inspirasjon frå andre som syr så flotte strikkevesker, har eg endeleg prøvd å sy ei eg og.

Ei god forklaring fann eg på denne bloggen.

Har brukt same stoff som til posane i innlegget under.

Så har den fått for.

Her er baksida, med ein liten stoffbit, i same stoff som foret.

Dette er ei lita strikkeveske, men med god plass til to nøster.

Eg passa på å sy i glidelåsen slik at på toppen av glidelåsen der det ikkje er taggar vart det eit hol, der ein kan dra tråden gjennom, og kan dermed ha glidelåsen igjen medan ein strikkar eller heklar. Etterpå er det lett å få heile arbeidet inni veska.

Ha ein fin søndag :)

Oppbevaringsposar

2011-08-21T20:02:00.000+02:00

Det er alltid kjekt å sy litt småting innimellom. Kom på at eg hadde noko striestoff, og tenkte at det kunne vera greit til oppbevaringsposar.

Ytterstoffet er tjukt bomullsstoff, og så tok eg striestoffet til for.

Stoffa er så tjukke at eg ikkje trong noko mellomlegg.

Ein liten og ein litt større pose som kan brukast til litt av kvart.

Så er eg så heldig at eg har vunne hos Bentes Quiltehage. Tre flotte stoff som kjem til å bli brukt etter kvart som ideane dukkar opp.

Ynskjer alle ei fin veke :)

Strikkasett til bestemorguten

2011-08-15T22:05:00.000+02:00

Dette settet strikka eg til bestemorguten tidleg i vår til bursdagen hans. Eg var spent på om det passa, for eg hadde ingen å prøva det på då eg strikka det. Her er bestemorguten oppi leikekassen med settet på seg.

Det er hue, skjerf og leggvarmarar, og skjerfet er så langt at det skal to gongar rundt halsen. Dersom ein vil ha hua litt kortare bak, kan ein strikka litt ferre omg før ein tek til på fellinga. Den er strikka i dobbelt garn av babyull i fargane lilla og grå, som gjer ein fin melert effekt.

Oppskrifta er lagt ut på Epla som PDF-fil.

Vår og haustvottar

2011-08-02T19:24:00.001+02:00

Her er det berre blitt litt småstrikk i det siste. Barnevottar strikka i Robust sokkegarn. Det er forholdsvis tynt, så vottane eignar seg vel best som vår og haustvottar.

Enkelt mønster, som blei til etter kvart som eg strikka.

Kanskje eg prøver å strikka dei i eit anna garn og.

Ynskjer alle ei god veke :)

Muffinsformer

2011-07-27T19:04:00.000+02:00

Det er ikkje alltid ein finn det ein er ute etter, og så blir det kjøpt noko liknande som viser seg å vera like bra.

Eg var ute etter muffinsbrett, men det fann eg ikkje. Derimot fann eg desse silikonmuffinsformene på Eoropris.

Og det er eg i grunnen glad for, for det er plass til mange slike på eit steikebrett dersom ein vil laga litt stor porsjon. Det er 12 i ein pakke, og eg sette vanlege papirformer oppi dei når eg prøvde dei. Det fungerte fint, men dei kan nok og brukast utan former oppi.

Når eg skulle oppbevara dei, hadde eg egentleg "ingen" plass å ha dei. Då kom ideen at eg kunne sy ein oppbevaringspose til dei. Kvitt bomullslerret og broderigarn hadde eg, og resultatet vart denne posen. Eg har laga den så stor at det er god plass til fleire former og. I stadenfor å gøyma den inni skapet, heng den no klar på kjøkkenet.
Dersom ein treng ei lita gåve, kan ein heimelaga pose med slike muffinsformer kanskje vera ein god ide :)

Småting

2011-07-13T11:55:00.000+02:00

Sommaren er vel ikkje rette tida for hyppige blogginnlegg, og når inspirasjonen er fråverande, så blir det mest småting og tang.

Denne korga er hekla av makrametråd som eg hadde.

Det er ganske tjukk tråd, og for å få den stødig, brukte eg heklenål nr. 10.

Den er allerede tatt i bruk til oppbevaring av glidelås.

Denne er hekla av mattefiller. Dei var ganske tjukke, så her brukte eg heklenål nr. 15. Diverse snor og band har fått plass i denne.

Begge to er stødige, og held godt på fasongen. Dei fekk seg ein runde ilag i vaskemaskina etter dei var ferdige. Det var kanskje ikkje så lurt, for det viste seg at det raude stoffet farga litt av, så det vart eit rosa skjær på den kvite. Men pytt sann, eg skal ha dei sjølv, og dei er bra nok for meg til sitt bruk.

Ha ein fortsatt god sommar :)

Tekanneskjerf

2011-06-24T19:01:00.000+02:00

For å halda teen varm på tekanna, har eg ganske enkelt strikka eit tekanneskjerf i ull. Brukte to ulike fargar, så det vart ein melert effekt. Knappane er gjenbruk.

La opp eit passeleg antal masker, og strikka to rett, og to vrang. Hugs at det trekkjer seg litt saman, så legg gjerne opp nokre ekstra masker så det blir breitt nok. Strikk og inn så mange knapphol som du vil ha.

Strikka inn eit passeleg hol til tuten. Prøv det på undeveis, for å sjå kor langt du treng det.

Når det var ferdig, tredde eg det gjennom hanken, og knappa det igjen.

God helg alle saman :)

Endå ein rund pute

2011-06-12T10:09:00.000+02:00

Då har eg hekla ein rund pute til, men denne gongen i rosa og kvit.

Denne og har omvendte fargar, og kan brukast på begge sider.

Både den rosa og den blå er lagt ut på Epla.

Ynskjer alle som er innom bloggen min, ei riktig fin pinsehelg :)

Ein rund pute

2011-06-07T19:12:00.001+02:00

Etter ein del prøving og feiling har eg hekla ein rund pute.

Den kan brukast på begge sider, og har omvendte fargar.

Eg tok utgangspunkt i blomsten som eg hekla på denne puten. Istadenfor å hekla ein firkant rundt, hekla eg ein runding.

Dermed hadde eg utgangspunkt til ein rund pute.

Den blir nok lagt ut på Epla med det første.

Så vil eg takka for alle koselege kommentarar som eg har fått. Eg set stor pris på dei, og synest det er så kjekt at vi kan vera til inspirasjon for kvarandre :)

No knead bread

2011-05-31T19:11:00.000+02:00

Ja, no har eg og prøvd å baka dette brødet. Det var ei spennande, enkel og annleis oppskrift.

Eg fann den på Husmorblogg, og der finn du og linkar og videoar til oppskrifta.

Eg hadde ikkje noko gryte som eigna seg inni omnen, så eg brukte ei eldfast form/skål, og la ein middagstallerk over. Det fungerte fint.

Mmmm....nydeleg. Berre prøv :)

Trekantvesker

2011-05-25T18:24:00.000+02:00

No har endeleg eg og prøvd å sy trekantvesker. Inspirasjonen fekk eg på Mormonsen sin blogg. Der kan du sjå flotte trekantvesker som ho har sydd, og ei god og enkel forklaring :)

Dette er den første eg sydde, og det meste er gjenbruk. Hestemerket fann eg i syskrinet, og det var i si tid på ei bukse som eg sydde til pappaen til bestemorguten. Buksa er forlengst utslitt, men merket tok eg vare på.

Broderte på namnet til bestemorguten, så denne er det nok han som får til å ha hemmelege ting i :)

Så vart det ei til, som vart litt mindre. Den pynta eg med ein hekla snøkrystall som eg hadde.

Desse er utan for, og då eg skulle sy denne, fann eg ut at eg ville prøva å sy den med fransk saum, slik at sårkantane vart skjulte. Det fungerte bra, og dette er den eine saumen inni veska. Det er enkelt å sy slik saum: Du syr først saumane frå retta, så vrenger du den, og syr frå vranga. Dermed blir sårkanten skjult inni saumen.

Her ventar vi på våren, og håper den kjem snart :)

Vaskevott til dame

2011-05-18T19:30:00.001+02:00

Med regn og kaldt vær, passar det godt å vera inne og kosa seg med strikking.

Denne gongen har eg strikka vaskevottar til damer. Dei er strikka i rillestrikk, med dobbelt bomullsgarn. Har brukt to ulike fargar, så det blir ein melert effekt. Hekla ei hempe til slutt. Har ikkje skreve ned noko oppskrift, men det er berre å strikka ein vott utan tommel.

Dei er allerede lagt ut på Epla.

17.mai-blomst

2011-05-08T13:01:00.000+02:00

Eg hadde egentleg ingen planar om å laga innlegg som var 17.mai-relatert. Men når ideane dukkar opp, må dei som regel prøvast ut. Her har eg hekla ein 17.mai blomst som kan brukast i staden for dei tradisjonelle sløyfene.

Etter litt prøving og feiling, vart det 4 stk. Det er sikkerhetsnål på baksida til å festa dei med.

Dei er allerede lagt ut på Epla.

Ha ein flott dag :)

Glasbrikker til 17.mai.

2011-05-06T18:07:00.000+02:00

Det blir eit lite 17.mai-innlegg til her frå meg. Denne gongen har eg hekla glasbrikker i flagget sine fargar.

Det er same mønster som på den blå puten (eit par innlegg lenger ned), men utan firkanten rundt.

Dei er allerede lagt ut på Epla.

Ynskjer alle ei flott helg :)

17. mai-stemning på kjøkkenet

2011-05-04T17:21:00.000+02:00

For å laga litt 17. mai-stemning på kjøkkenet, vart det ein klut i flagget sine fargar.

Den er hekla i same oppskrift som dei andre klutane mine: 1 lm mellom kvar fm. Det blir luftige og gode klutar.

Det vart og ein trepakning i dei same fargane.

Desse blir lagt ut i hobbybutikken min på Epla.

Håper vi får mange fine Maidagar :)

Ein blå pute

2011-04-28T18:56:00.000+02:00

Påska og gode dagar med bestemorguten er over, så no er det tilbake til kvardagen igjen.

Etter at eg hekla nokre putar med bestemorruter, fekk eg lyst til å prøva å laga ei ny oppskrift på heklerute. Den har eg kombinert med bestemorruter, med ei litt annna avslutning.

Rutene har eg så hekla saman.

På andre sida av puten har eg først hekla ei rute, og så fortsatt vidare som på ei bestemorrute.

Det var nok mykje meir arbeid med ei slik pute, men det var kjekt med litt forandring :)
Og oppskrifta? Den er ikkje kome ned på papiret enno.

Oppskrift på barnevesten

2011-04-19T15:27:00.000+02:00

No har eg lagt ut oppskrift på barnevesten som eg strikka tidlegare til bestemorguten. Her er han med vesten på, og er ca. 8,5 mnd. Ein ser at vesten er rikeleg stor til han, så den vil nok passa ei god stund framover.

Oppskrifta kan kjøpast på Epla.

Ser fram til mange koselege dagar med denne go`guten i påska :)

Ynskjer alle ei flott påske :)

Litt påske/vårfargar

2011-04-06T18:35:00.000+02:00

Her er det ikkje anna nytt enn at ting har skifta fargar.

Koseleg med klutar i påske/vårfargar.

Pynteskåler som kan fyllast med påskegodt, og pompadour som kan brukast til litt av kvart.

Kjekke småting å hekla, og som blir fort ferdige :)

Hexagonteppet endeleg ferdig

2011-03-31T20:10:00.000+02:00

Eg brukar egentleg ikkje å ha så mange ufoar, men dette vart av ein eller anna grunn lagt vekk. Då eg no tok det fram igjen, viste det seg at det ikkje var så mykje som skulle til før det var ferdig.

Veldig kjekt teppe å hekla, og det er hekla av restegarn og diverse opprekksgarn. No ligg "finsida" opp, så det er nok fleire fargar inni teppet enn det som viser her.

Rundt kanten hekla eg først ei rad med fastmasker, deretter ei rad med krepsemasker. Det gjorde at det vart ein stødig kant på teppet.

Endå ein hekla pute

2011-03-25T17:38:00.001+01:00

Det er vel tvilsomt om våren kjem raskare sjølv om eg heklar ein vår/påske/sommarpute :) Men det var i alle fall kjekt å hekla med slike fargar og drøyma seg vekk ei stund...

Den er hekla i Tuva bomullsgarn, med heklenål nr. 3,5.

Når sommaren er over er det berre å snu puten, så er det ein ny pute på andre sida.

Ynskjer alle ei triveleg helg :)

Surre-rundt -skjerf og vottar

2011-03-19T10:50:00.000+01:00

Det er ikkje alltid ting blir blogga rett etter at det er laga. Denne halsen har varma Svanhild det meste av vinteren. Oppskrifta fann ho sjølv på Pickles. Det er eit artig mønster, som eg dessverre ikkje får fram på bileta.

Den er strikka i same garn som gensaren under, men her har eg brukt det dobbelt , og den er strikka på pinne nr. 15. Eg har aldri strikka på så tjukk pinne før, så eg måtte kjøpa ein. Eg fann den berre i metall, og det var ikkje akkurat det mest ideelle til den oppskrifta. Den var så glatt, så eg måtte vera eksta på vakt så eg ikkje mista ned ei maske. Resultatet er eit veldig langt og varmt skjerf som kan surrast mange gongar rundt halsen.

Så ville ho gjerne ha seg eit par nye vottar, og det fann ho i lageret. Ull er gull når det er kaldt, og med den kalde vinteren vi har hatt, har det kome godt til nytte.

Her ser det ut til å bli ein fin dag med sol frå skyfri himmel.

God helg til alle som er innom bloggen min :)

Varm og enkel gensar.

2011-03-11T19:08:00.000+01:00

Denne gensaren har allerede varma dotter mi Svanhild, det meste av vinteren. Det er ein enkel gensar å strikka, men det var slik ho ville ha den. Den er strikka i Oda frå Europris. Det er eit rimeleg garn med 50% ull, og 50% akryl, men det er veldig mjukt og godt.

Ho ville ha armane litt lange.

Brotet ville ho ha litt stramt, så ho kan dra det lenger opp utan at det sig ned.

Halsen ville ho ha litt vid ut på skuldrane.

Oppskrifta har eg berre skreve ned i stikkordsform, så her er ei cirkaoppskrift for den som måtte ynskja det:

Den er strikka på pinne nr. 6, og eg brukte litt tynnare pinnar til brota. Og det er ca. str. SMALL.

Bolen:

Legg opp 112 m.

Strikk brot 1 r - 1 vr.

Auk til 132 m.

Str bolen så lang du ynskjer den.

Del arbeidet, og str armhol så lange du vil ha dei.

Eg strikka halsen berre litt utringa framme.

For at halsen skulle bli litt vid, maska eg saman berre 15 m på kvar skulder.

Str eit lite brot i halsen til slutt.

Armar:

Legg opp 36 m.

Str brot 1 r - 1 vr.

Auk 4 m etter brotet.

Auk 2 m kvar fjerde omg. til armen er like vid som armhola.

Fell av, og sy på armane.

Og vips, så var gensaren ferdig :)

God helg, og takk for alle koselege kommentarar :)

Vaskevott til barn

2011-03-05T10:50:00.001+01:00

Har strikka vaskevottar til barn i bomullsgarn. Eg har strikka dei i glattstrikk, så dei skal vera glatte og gode mot barnehuda.

Eg har ikkje skreve ned noko oppskrift, men det er berre å strikka ein vott utan tommel. Eg hekla ei hempe til slutt, før eg klipte av garnet.

Restegarnet har vore med og bestemt resultatet, og det samarbeidet fungerte bra :)

Barnevest

2011-02-26T10:27:00.000+01:00

Først vil eg takka for alle hyggelege gratulasjonar på bursdagen min :) Dette er vel den mest overraskande og originale bursdagsgåve eg har fått, og med det nye designet som ho teikna, er det vel ikkje tvil om at det er ein handarbeidsblogg! Berre ikkje sauen spring fortare enn strikkepinnane greier å følgja :)

Så har eg strikka to barnevestar. Oppskrifta har eg laga sjølv, og dei er strikka i Tiur dalegarn og Silja på pinne nr. 3,5. Trur den passar frå ca. 8 mnd. og oppover. Den nederste fekk bestemorguten når han var ca. 8 mnd, og då har han litt å veksa i.

Den øverste blir lagt ut på Epla i løpet av helga.

God helg til alle som er innom :)

Gratulerer med dagen!

2011-02-22T00:08:00.002+01:00

Heiheihei bloggfolks! Svanhild speaking, dottera til Bodil.

Gratulerer så mykje med dagen din, Mamma!
Du er verdens beste (om ein ser vekk frå mas om å hjelpe til med bloggen. Heheheee). Eg hadde mine tvil om at eg skulle bli ferdig med årets bursdagsgåve til deg, men det ser ut som om eg klarte å komme i mål! Har pønska på dette lenge, og har no gjort ein skikkelig heftig innspurt dagen før dagen. Håper du får ein fin bursdag, og at du har laga deg ei god kake! Skulle gjerne sagt at det var trist eg ikkje får vere heime på bursdagen din sidan eg ikkje bur heime lenger, men som vi begge veit, klarer eg alltid uansett å reise vekk på vinterferie på dagen din.

Gratulerer med nytt design på bloggen din, håper du er nøgd med det (etter mykje slit og strev frå mi side)! Gla i deg. Stor klem frå Svanhild :)

(Dersom du ser dette før du fer på jobb, ikkje prøv å kontakte meg på nokon måte, eg har fri og vil sove til 11).

Hekling igjen

2011-02-16T17:31:00.000+01:00

Når eg først er i heklemodus, tek det visst ei stund før det går over.

Som de ser, så er det blitt endå ei pute. Ei lang denne gongen, og som slett ikkje var lett å ta bilete av!

Eg har brukt same mønster som på gryteklutane under, og hekla den rundt. Den er derfor lik på begge sider.

Takk for mange koselege kommentarar på gryteklutane i forrige innlegg :) Forstår det er mange som mimrar tilbake, og kan hugsa slike gryteklutar frå barndomen :)

Gryteklutar

2011-02-09T20:20:00.000+01:00

No har eg kosa meg med å hekla desse gryteklutane som er blitt så populære igjen.

Her ser fargen lilla ut, men dei er lys blå.

Dei er hekla i Tuva bomullsgarn med heklekrok nr. 3,5.

Eg hadde eit par gamle som eg såg etter når eg hekla dei, men eg ser at dei fins i mange variantar.

Blog2print

2011-02-05T12:21:00.000+01:00

Å kjøpa bloggen sin i bokform synest eg er ein god ide, og eg ser at det er mange som gjer det.

Kvaliteten på bøkene er god, og det er tjukke ark som tåler å bli bladd i. Eg synest og at bileta er bra kvalitet, men det er ikkje så lett å få vist her.

Bøkene er kjekke å ha som oppslagsverk når PC-en ikkje er i nærleiken.

Her er det oppskrifter på både strikking og mat.

Det er og eit register framme i boka, så det er enkelt å finna fram til det ein er ute etter. Lurer du på kvar du får kjøpt den, finn du link til høgre i bloggen min: Blog2print.

Ynskjer alle ei flott helg :)

Og vinnarane er

2011-02-01T19:44:00.000+01:00

No har eg trekt vinnarane av lotteriet mitt, og dei som vann var desse:
Muffin med bloggen Muffins verden vann løparen.
Ruths datter med bloggen Ruths datter vann garnet som eg har spunne.
Marit Johanne med bloggen Marits hobbyblogg vann klutar og kjøleskapmagnetar.

Gratulerer til vinnarane :) Sender gevinstane når eg har fått adressene.

Tusen takk til alle som var med :)

Bestemorruter

2011-01-29T16:13:00.002+01:00

Det er inspirerande å sjå kor mykje forskjelleg som blir laga av bestemorruter på bloggane. Ikkje minst alle dei fine lappeteppa som ser dagens lys.

Eg har gjort det enkelt, og hekla ei stor rute til ein pute.

Dette er ikkje ein pute til, men den andre sida av puten. Er ein lei av den eine sida, er det enkelt å fornya den med ein anna farge.

Eg hekla saman begge rutene på siste omgong, og hekla knyteband av luftmasker.

Har du lyst å vera med på lotteriet mitt, er det enno tid til det. Du finn det her: Å gje tilbake.
Ynskjer alle ei flott helg :)

Pompadour

2011-01-23T10:43:00.000+01:00

Har styrt med litt småhekling i det siste. Det har resultert i diverse pompadour i ulike størrelsar. Oppskrifta vart til etter kvart eg hekla.

Treng ein fin innpakning til eit smykke, eller treng ein plass å oppbevara det, passar denne minste utgåva godt.

Har ein maskemarkørar som ein ikkje finn når ein treng dei, så kan desse passa godt til det.

Kanskje lurt å ha ein plass å gjera av alle dei fine knappane.

Og kva med alle perlene. Her er det plass til ein heil del. Eller så kan ein jo bruka dei til det ein vil.

Så har eg vore så heldig å få møta ei god bloggveninne og namnesøster i det siste. Det var kjempekoseleg. Bodil er ei kreativ og hyggeleg dame som lagar mykje flott, og du finn bloggen hennar her: http://bodilhver.blogspot.com/

Det er enno tid til å melda seg på lotteriet mitt for dei som ynskjer det. Du finn det eit par innlegg lenger ned.

Småstrikk igjen.

2011-01-17T15:12:00.000+01:00

Her går det i småstrikk igjen. Etter å ha strikka eplehuer, fann eg ut at eg måtte prøva meg på pærehuer og. Resultatet vart desse.

Strikka ganske enkelt ei lita ribbestrikka hue som passa til ei pære, og det fungerte bra.

Her har eg strikka til store pærer,

og her til mindre pærer.

I etterkant viste det seg at dei passa godt som eplehue og, så der fekk eg i både pose og sekk :)

For dei som har lyst til å vera med på lotteriet mitt, så finn de det i innlegget under. Det er berre å skriva ein kommentar, så er de med :)

Å gje tilbake

2011-01-11T17:51:00.002+01:00

No er det min tur igjen å gje tilbake litt her i bloggverda. I februar har eg blogga i 2 år. Det har vore to svært kjekke år, der eg har fått masse inspirasjon, og mange hyggelege kommentarar.

For ca. 1,5 år sidan, då eg så smått tok til å spinna, syntest eg det var greit å ha ein blogg berre for det. Der har eg ikkje hatt noko lotteri enno, så for å gjera dette enkelt, slår eg saman begge desse lotteria.

For å vera med på dette, er det nok at du legg igjen ein kommentar på dette innlegget. Du som ikkje har blogg, er og velkomen til å vera med.

Det blir tre gevinstar, og det du kan vinna er dette:

Ein kvit strikka løpar, ca. 85 cm lang.

Tilsaman 100 gram garn som eg har spunne, ca. 364 meter. Det er to-tråds 100% merinoull.

To hekla klutar, pluss to hekla kjøleskapmagnetar.

Trekninga blir 1. februar. Vil du vera med så heng på :)

Småstrikk igjen

2011-01-04T16:08:00.001+01:00

Det er alltid kjekt med litt småstrikk innimellom. Denne gongen vart det noko som eg har kalla eplehuer. Har du med deg eple i sekken eller i veska, er denne eplehua lur å ha. Den vernar eplet mot støt, så det held seg friskt og fint.

Eg strikka ganske enkelt små huer som skulle passa til ulike storleikar på epla.

Dei på øverste bilete er til store epler, og dei på nederste er til mellomstore.

Slik småstrikk er og ein fin måte å få brukt litt restegarn.

Pyntehandkle

2010-12-18T10:51:00.010+01:00

Endeleg har eg fått brukt mønsteret som eg kjøpte hos Muffin. Ho er jo så flink, og teikningane hennar er ei fryd å brodera etter.

Juleduk har eg ikkje starta på enno, men eg brukte nokre av figurane og broderte eit nytt pyntehandkle til jul.

Eg valde ein av dei store englane som motiv.

Rundt stjerna var det ein strofe av ein juesong, men her syns eg det var nok med berre stjerna.

Blonden hadde eg frå før. Den har eg hekla med tynn nål for lenge sidan, og eg brukte den ei stund på nokre hyller.

Eg har brukt fleirfarga moulinegarn til broderiet, og det synest eg gav meir liv til mønsteret.

Fordi pyntehåndkleet blir bretta framover på stanga det heng på, så må det faldast frå begge sider. Då klipper eg først eit hakk der det blir lagt over. Så syr eg ein fald frå kvar si side.

Forma er ikkje på topp for tida, men med ei snill dotter som er kome heim på juleferie, ordnar det meste seg til jul.

Det har vore eit kjempekjekt bloggår, og eg vil takka for alle koselege kommentarar.

Håper de får ei fin jul alle saman. Juleklem frå Bodil :))

Sjal og pynteskåler

2010-12-04T08:39:00.008+01:00

Det er kjekt med litt sjalstrikking innimellom, og dette og er strikka i Trysil babyull.

Har laga mønsteret sjølv, og sjalet er ei gåve.

Greit med ein farge som passar til alt, når ein ikkje veit kva farge mottakaren likar.

Så har eg hekla tre større pynteskåler.

Dei er ca. 13 cm i diameter, og dei er så stødige at dei og held forma utan noko oppi.

Ellers kan dei brukast både til telys, gotteri, småkaker og anna ting og tang. Dei er allerede lagt ut i butikken.

Ynskjer alle ei fortsatt god førjulstid :)

Hekla pynteskåler

2010-11-25T18:56:00.007+01:00

Eg held framleis på med same oppskrift som i tidlegare innlegg.

Denne gongen vart det pynteskåler.

Dei er hekla med dobbelt bomullsgarn, og kan vaskast på 60 grader.

Den eine er ca. 8 cm, og den andre er ca. 9 cm i diameter.

Dei kan fyllast med gotteri, eller brukast til anna ting og tang. Eller dei kan berre stå til pynt.

Så har eg og hekla nokon gryteunderlag. Dei og er i same oppskrift.

Desse småtinga passar godt som vertinne/veninnegåver, og som smågåver til jul. Alt er kome på plass i butikken min.

Ynskjer alle ei fin adventshelg :)

Diverse glasbrikker

2010-11-19T17:12:00.009+01:00

No har eg hekla ein del glasbrikker i det same mønsteret som før. Sidan det snart er jul, så vart det litt julefargar på nokon av dei. Dei blir vel lagt ut på epla i løpet av helga, og eg sel dei i pakkar på seks stk.

Sidan det snart er advent, så vart det nokon i adventfargar og.

Det kan jo og vera greit å ha nokon som kan brukast heile året.

Alle er hekla i bomullsgarn, og kan vaskast på 60 grader.

Så var eg så heldig å få pakke i posten i dag. Eit par flotte sokkar strikka i 80% babyalpakka, og 20% silke :) Det må jo bli mjukt og godt. Var med på ei utlodning på ein koseleg blogg som heiter Hima på Høyvik. Dei er nok for store til meg, men eg har fleire som dei passar til, så dei vil nok bli godt brukte :)

Ynskjer alle ei fin helg :)

Julekuler igjen

2010-11-12T18:37:00.007+01:00

Så vart det endå fleire julekuler herifrå. Koseleg småplukk som ikkje krev den heilt store konsentrasjonen. Alle er hekla i bomullsgarn, i same oppskrift som før.

Dei er allerede lagt ut i butikken min.

Desse vottane har eg blogga før. No skal dei same veg som kulene og PC-trekket under.

Det har vore ferdig ei stund, og er akkurat same oppskrift som dei andre eg har laga, og dei passar til ein 10" PC.

Eg har sydd på solide trykknappar.

Har og hekla ein liten innerlomme, der det er plass til minnepinne eller andre datadippeduttar.

Ynskjer alle ei fin helg og førjulstid :)

Småplukk igjen

2010-11-07T11:36:00.007+01:00

Her er endå litt meir småplukk frå meg.

Fekk lyst til å prøva meg litt meir med julekuler.

Det vart ei lita korg til kvar kule.

Oppskrifta er fortsatt den same som til smilefjesa og brikkene.

Men når eg er ferdig med å auka, så heklar eg berre i bakre maskeledd.

Både på kulene og korgene har eg hekla ein omgang meir med auking enn på smilefjesa.

Så har eg klargjort desse vottane og lagt dei ut i butikken min.

Sjal og klutar

2010-10-30T21:54:00.006+02:00

Her har eg strikka to like sjal.

Begge er strikka i same farge og mønster. Det er mitt eige mønster, og eg har strikka det før , men då med sjølvspunne garn. Det kan du sjå i spinnebloggen min.

Desse er strikka i Trysil babyull, som eg synest var eit godt garn å strikka sjal av.

Begge to er gitt bort i gåve til fornøgde mottakarar.

Så har eg gjort ferdig nokon fleire klutar, som etter kvart blir lagt ut i butikken.

Det er så kjekt med alle koselege kommentarar som eg får, og eg set stor pris på dei :) Ynskjer alle ei fin helg :)

Litt småplukk igjen

2010-10-27T16:44:00.006+02:00

Har brukt restegarn igjen og hekla diverse små kurva.

Det er same oppskrift som til smilefjesa.

Aukar til du har så stor botn du vil.

Så heklar du vidare utan auking. Hekla ei rad krepsemasker til slutt. Pynt dei slik du vil.

Av nokre smårestar vart det tre hekla julekuler, sjølv om det nok er dei strikka som er in i år :)

Vinterplagg

2010-10-20T19:52:00.006+02:00

Fekk telefon frå dotter mi om eg kunne strikka ei hue til henne lik ei ho hadde funne på ein blogg. Slike telefonar er jo koselege å få, så det sa eg ja til :)

Bloggen viste seg å vera Judith sin strikkeblogg, ein blogg som eg ofte er innom. Ho er ei erfaren strikkedame som strikkar mykje flott. Vart litt usikker om eg ville få til flettemønsteret, for eg hadde berre bilete å sjå etter. Men det sto kor mykje ein skulle leggja opp, og str. på pinnane.

Eit flott flettemønster som ikkje var så vanskeleg å få til som eg trudde. Kanskje ikkje heilt likt med antal omg. mellom flettene, men sånn ca. i alle fall. Eg brukte Tiur Dalegarn, dobbel tråd.

Den er no på veg i posten, og håper den blir god å ha til vinteren.

Så er det blitt fire isskrapevottar som eg har strikka på innimellom andre prosjekt. Dei blir lagt ut på Epla med det første.

Litt småplukk igjen

2010-10-14T17:10:00.012+02:00

Kjøpte magnetar på Panduro, med tanke på å bruka dei som kjøleskapmagnetar. Resultaet vart diverse smilefjes som eg hekla. Her kjem restegarnet til god nytte. Har ikkje limt på magnetane enno, for eg har gløymt å kjøpa lim.

Hekla like godt eit par gryteklutar i same mønster, og med smilefjes på mitten.

Som de ser, så er gryteklutane femkanta. Det er same oppskrift som smilefjesa, men når dei blir hekla større, så kjem femkantforma fram.

Etter same oppskrift har eg og hekla brikker til å ha under koppen.

Har hekla dei i mange ulike fargar for å finna ut kven eg vil hekla meir av.

Oppskrifta er enkel.

Her er den:

Legg opp 4 lm og ta saman til ein ring.

Hekle til saman 10 fm rundt ringen.

Hekle 1 fm(den første fm er ei lm), 2 fm i neste, 1 fm, 2 fm i neste ut omg.

Hekle 1 fm i kvar av dei to første maskene, 2 fm i neste osv. ut omg.

Siste omg er ein omgang med krepsemasker (heklar fm frå venstere mot høgre).

Desse omg utgjer smilefjesa.

På gryteklutane og brikkene fortset du på same vis. Det blir automatisk ei fm meir mellom kvar auking, og avslutt med ein omg. krepsemasker når du synest dei er store nok.

Tusen takk for alle koselege kommentarar på forrige innlegg, og god helg til alle som er innom bloggen min :)

Babysett

2010-10-05T20:32:00.012+02:00

Har strikka dette settet til bestemorguten.

Hadde ikkje mønster, men tok maskeantal frå ei anna oppskrift.

Fann ut at eg ville ha lommar på den, og eg strikka ein liten bamse som fekk plass der. Kjøpte koselege bamseknappar, og sydde ein på kvar lomme og.

Strikka stolpane samtidig, og for å få dei til å festa seg til jakka( sidan dei er ein anna farge), så snudde eg trådane om einannan på vranga. Det fungerte bra.

Kragen, brota og stolpane er i perlestrikk, og eg har brukt raglanfelling. Synest det er ei god felling til barn.

Kjekt at slike smetteskjerf er i vinden igjen.

Og her er vottane med knyteband, så dei held seg bedre på plass.

Slik bamse hugsar eg ungane strikka på skulen, så eg prøvde å hugsa korleis dei var, og resultaet vart slik.

Eg hadde ikkje strikka hue til settet, men ein kveld så vart det ei av restane likevel. Av den siste enden av tråden broderte eg ein enkel bord rundt. Eg trudde eg hadde strikka den altfor stor, men bestemorguten har blitt så stor at den passa akkurat. Den er strikka i dobbel tråd, så den er tett og god.

Småplukk

2010-09-24T17:41:00.006+02:00

Innimellom er det kjekt å laga diverse småting som ikkje krev så mykje hodebry. Desse vart laga på eit par kveldar , med litt restegarn.

Det første her er hekla med same mønster og garn som på klutane og PC-trekka: Ei lm mellom kvar fm. Det er hekla med dobbel tråd.

Dette blå og kvite er hakka. Her og er det bomullsgarn, men enkel tråd.

Så kom eg ikkje unna Islendermønsteret. Måtte berre prøva det på dette og! :)

Til slutt ein kombinasjon mellom pjoning og hekling. Eg har aldri pjona før, men eg visste at det gjekk ut på å laga kjedemasker, og så blir mønsteret til ved enten å pjona i fremste eller bakerste maskeledd. Kjedemasker blir jo brukt i hekling. Ein brukar kjm for å avslutta ein omgang når ein heklar rundt, og ein brukar kjm for å koma seg til eit anna punkt i heklinga. Eg hadde i utgangspunktet tenkt å berre pjona dette, for å prøva teknikken. Men det vart så spennande å prøva å kombinera begge teknikkane, så dermed vart det slik. Eg starta med eit brot med pjoning, deretter pjona eg nokre omg. i fremste maskeledd. Så hekla eg ei rad fm, to rader st i begge fargar, og ei rad fm igjen. Så avslutta eg slik eg starta, først med pjoning i fremste maskeledd, og deretter eit brot i pjoning (I bakre maskeledd). Synest det gjekk godt an å kombinera desse to teknikkane.

Ynskjer alle ei fin helg, og takk for alle koselege kommentarar :)

Islender og pulsvottar

2010-09-10T16:52:00.006+02:00

Kom på at eg hadde liggjande ein Islender som ikkje er i bruk lenger. Grunnen er at den vart etter kvart for kort til brukaren. Den er strikka i eit rimeleg garn frå Spar Kjøp, men eg hugsar ikkje akkurat kva det heitte. Den har vore vaska mange gongar, men er stort sett like fin.

Denne er strikka fram og tilbake frå armhola og opp. Eg brukar stort sett å gjera det, så lenge eg berre har to ulike trådar å strikka med. Eg synest det er mykje enklare og mindre tidkrevande enn å først strikka rundt, og deretter montera den.

Det er eit tidlaust mønster som er enkelt å strikka, men det fins andre variantar av det og. Kanskje nokon i bloggverda har strikka Islender i eit anna mønster som dei kan visa på bloggen sin :)

Fann ut at eg ville prøva korleis mønsteret fungerte til eit par pulsvottar. Hadde noko garn som kunne brukast, og det vart to par i omvendte fargar.

Ynskjer alle ei riktig fin helg, og tusen takk for alle koselege kommentarar :)

Vottar og siklesmekker

2010-08-31T18:14:00.006+02:00

Det er ikkje dei heilt store prosjekta her for tida. Har strikka nokre vottar i størrelse ca. 1/2- 1 år. Dei er strikka i Tiur Dalegarn på p. nr. 3. Har ikkje noko oppskrift, men det er heilt enkle vottar med ei holrad med snor i, så dei set litt bedre på.

Her kan de sjå korleis eg gjer det når eg markerer der tommelen skal vera. Det er sikkert fleire måtar å gjera det på, men her er slik eg brukar.

Dette er jo små vottar, så eg vurderte at det var nok å setja av 6 masker til tommel. Då strikkar eg til det er 6 masker igjen på eine sida. Så tek eg ein trådende i ein anna farge og strikkar dei 6 maskene.

Så tek eg dei 6 maskene inn på ein anna pinne. Deretter tek eg den grå tråden som eg strikkar med, og strikkar over dei seks maskene.

Dermed er dei 6 maskene strikka mellom to omgangar, og kan lett trekkast ut når tommelen skal strikkast. Eg brukar og å ta opp nokre masker på sidene der tommelen skal vera. Her enda eg opp med 16 masker til tommelen, og syntest det passa bra.

Så har eg sydd to siklesmekker til. Denne gongen kjøpte eg plastbelagt frotte til å ha på baksida, men eg let frotteen venda ut. Likevel la eg inn eit lag med vanleg frotte denne gongen og. Desse to er lagt ut på Epla.

Siklesmekker

2010-08-18T18:41:00.007+02:00

Det er lurt å ha, så ein ikkje blir våt og kald på brystet. Har sydd to siklesmekker til bestemorguten. Stoffet er kjøpt på Panduro, utan at eg visste at det var dette eg skulle bruka det til.

Eg var usikker på kva fasong dei skulle ha, og korleis eg skulle sy dei. Men her er det eg kom fram til.

Eg brukte tre lag med stoff. Tjukt bomullstoff til bakside (gjenbruk). Frotte i mitten (gjenbruk), og til slutt stoffet frå Panduro. Sikka gjennom alle tre laga før eg sydde på blonden.

Her kan de sjå at mønsteret som eg har laga, er ganske enkelt to sirklar. Til den største brukte eg ein middagstallerk, og til den minste ei lita skål.

Så har eg laga ferdig to sett med klutar igjen.

Dei har allerede fått seg ein ny heim.

To ferdige PC-trekk

2010-08-03T18:57:00.008+02:00

Har hekla eit PC-trekk til, denne gongen i svart.

Begge to passar til ein 10" PC, og har lukking med solide trykknappar.

Dei har og innerlomme med plass til minnepinne eller anna tilbehør.

Som eg skreiv i forrige innlegg er dei hekla i same mønster som klutane, men med dobbel tråd. Innerlommen er hekla med enkel tråd.

Så har eg laga ferdig to sett med klutar.

Alt dette er no lagt ut i butikken min på Epla.

PC- trekk og fleire klutar.

2010-07-25T10:38:00.009+02:00

Det har vore lite blogging med meg i det siste, men her kjem endeleg eit nytt innlegg. Dette er eit PC-trekk som eg har hekla, og som etter kvart blir lagt ut på Epla.

Det er hekla i Tuva bomullsgarn med dobbel tråd, og mønsteret er det same som på klutane mine: Ei luftmaske mellom kvar fastmaske, og heklnål nr. 4.

Trekket passar til ein 10" PC.

Har sydd i tre store trykknappar, så det skal vera ei solid lukking.

Hekla ein liten innerlomme, der ein kan ha ein minnepinne, eller diverse andre datadippeduttar! Den er hekla med enkel tråd, og er ca. 11x16 cm.

Ellers er det klutar som er sommarhandarbeidet mitt. Dei blir gjort heilt ferdige litt etter kvart framover.

Rundstrikka lommetøfler

2010-06-26T11:24:00.008+02:00

Har lenge tenkt å strikka desse artige lommetøflene, og no har eg endeleg gjort det. Utruleg smart oppskrift, og som gjer ein god passform. Garnet eg har brukt heiter Robust sokkegarn, og eg har strikka med dobbel tråd på pinne nr. 4.

Har strikka to par, i omvente fargar.

Men fordi eg helst likar å strikka rundt, så måtte eg jo prøva meg på det denne gongen og. Då strikka eg først begge endane.

Så tok eg det inn på ein rundpinne og strikka rundt resten.

Når det var langt nok, tok eg det over på to pinnar, før eg maska av under foten. Dermed vart det ikkje saumar å sy saman framme og bak. Og blir foten utslitt, er det enkelt å strikka ein ny.

Så er det og blitt nokre fleire hekla klutar i lik oppskrift som sist.

Ynskjer ei fin helg til alle som er innom bloggen min :)

Utfordring

2010-06-18T17:05:00.007+02:00

For eit par veker sidan fekk eg ei utfordring hos Strikkebesta i bloggverda. Utfordringa starta opprinneleg på ein blogg som heiter Hagebø. Gå gjerne inn på bloggen og les meir om utfordringa der. Eg vel å gje utfordringa vidare til dei som har lyst til å laga, eller har gryteklutar dei har lyst til å blogga.

Her er gryteklutane som eg har hekla. Dei er hekla i dobbelt Solberggarn, og eg valde å bruka fastmasker så dei skulle bli tette og gode. Oppskrifta er enkel:

Legg opp 5 lm.

Hekle til saman 12 fm i ringen.

Hekle 3 fm- 1 lm til det er 4 hjørner.

Hekle 3 fm, 1 fm- 1lm- 1 fm i kvart hjørne. Gjenta ut omgangen.

Hekle 4 fm, 1 fm- 1 lm- 1 fm i hjørnet. (5 fm, så hjørnet) ut omg. Avslutt med 1 fm etter siste hjørnet.

Slik fortsett du, og det blir automatisk auka to masker på kvar langside på grunn av hjørnene som blir laga.

Hekle til du har 19 fm på kvar langside (då tel eg ikkje med hjørnene).

Hekle så ei rad rundt med 1fm og ei lm. Hugs 1 fm- 1 lm- 1 fm i kvart hjørne.

Kanten til slutt heklar du slik:

2 st-1 lm- 2 st rundt første buen. 1 fm i neste bue. Gjenta ut omg.

Hempe lagar eg ved å hekla 3 lm ekstra i eit av hjørna.

Desse gryteklutane fann eg oppskrift til på Hagebøbloggen. Dei er strikka i Dominostrikk, og var ein super måte å strikka gryteklutar.

Så kom eg på at eg hadde desse søte gryteklutane liggjande i ei skuffe. Dei er jo frå forrige århundre, men er vel like aktuelle og populære i dag :)

Ynskjer alle ei fin helg :)

Gryteunderlag

2010-06-11T18:15:00.002+02:00

Her har eg hekla gryteunderlag i same mønster og garn som klutane, men eg brukte dobbel tråd.

Har variert litt med fargane.

Både klutane og gryteunderlaga finn de på epla.

Klutar

2010-05-22T15:28:00.007+02:00

Når det vårast er det kjekt å ta fram litt bomullsgarn igjen. Hadde tenkt å strikka klutar, men fann ut at eg ville prøva å hekla dei i staden. Hadde i tankane då eg starta at dei ikkje måtte bli for faste og tette. Dette er Tuva bomullsgarn, og når eg strikkar klutar av det, så brukar eg pinne nr. 4. Derfor fann eg fram heklenål nr. 4.

Oppskrifta vart enkel. Det er fastmasker med ei luftmaske mellom kvar fastmaske.

Her er ein prøveklut som eg hekla først. Måtte testa den i bruk, og då oppdaga eg at når den vart våt, så opna alle hola seg som er mellom fastmaskene. Dermed vart kluten ekstra luftig, og tørkar litt raskare opp etter bruk.

Her er den same kluten etter at den er blitt vaska på 60 grader, og hatt seg ein tur i tørketrommelen.

Ynskjer alle ei fin pinsehelg :)

Litt av kvart

2010-05-16T10:55:00.005+02:00

Har strikka to ullbodyar til bestemorguten. Han var fødd seks veker for tidleg, så eg fann ikkje noko mønster som var lite nok. Så dette er ei blanding av body-og ullskjorte, som eg har forminska ein god del. Likevel er det rikeleg stort. På armane plukka eg opp masker øverst og strikka framover, og på skuldrane har eg brukt maskesting. Så det er ingen saumar.

Så har eg kjøpt meg hode for å ha til sjala mine. Det er av isopor, men det eg ikkje tenkte på då eg bestilte det, var at eg burde hatt eit med sokkel , for då hadde sjala lagt seg finare rundt. Men, men, eg får greia meg med det ei stund. Lurer du på kvar eg har kjøpt det, så finn du det her på eBay, og det kosta under 100-lappen.

Kjekt å ha, og ting og tang posar.

2010-04-27T17:54:00.010+02:00

No har eg og kjøpt meg merker til å sy på det eg lagar, og jammen er det kjekt å ha. Det var på Sefta holm design sin blogg eg fann adressa, og den er her.

Har sydd nokon posar som eg kallar ting og tang posar. Dei kan brukast til oppbevaring av diverse ting og tang, eller brukast som gåveposar. Heklebrikkene hadde eg frå før. Posane er i ulik storleik, og er enkle å dra opp og igjen. Dei blir etter kvart lagt ut på Epla.

Å verta bestemor

2010-04-16T18:31:00.005+02:00

Tenk å verta bestemor.

Å få halda eit under i armane sine.

Å få kjenna den nye mjuke huda mot si.

Å ynskja at det må gå vel med dette barnet.

Dette ser eg fram til, for eg er blitt bestemor.

Litt hekling

2010-04-10T13:50:00.002+02:00

Har hekla desse tre kurvene av noko bomullsgarn som eg hadde. For å få ulik størrelse på dei, hekla eg berre ferre omgangar i botnen. Brukte ei tynnare heklenål enn vanleg, for at dei skulle bli faste og halda fasongen. Hekla til slutt krepsemasker rundt kanten som er bretta ned.

Her er eit prosjekt som eg held på med, og som kjem i neste blogginnlegg.

Ellers er det mest spinning eg styrer med for tida. Eg har strikka eit par nye sjal med mi eiga oppskrift, og vil du sjå dei finn du dei her. Det er enkle oppskrifter, men det var kjekt å få det til. Ha ei triveleg helg :)

GOD PÅSKE

2010-03-26T19:06:00.003+01:00

Er innom for å ynskja god påske til alle som er innom bloggen min. Påskehelsing frå Bodil :)

Shetland triangle shawl

2010-03-13T09:32:00.002+01:00

No har eg strikka eit sjal til i dette mønsteret. Kjekt å variera med forskjellege fargar, og sjå kor ulikt resultatet blir.

Dette garnet er spunne av 50% ull, og 50% soyasilke, som gjer ein fin glans.

Babyhuer

2010-03-05T18:47:00.002+01:00

Har strikka to babyhuer. Gjekk ut frå ei oppskrift, men det vart litt forandringar. I oppskrifta var det dusk, skygge og silkeband, men det vart litt i meste laget, syntest eg! I staden så hekla eg nokon snurringar i toppen. Dersom du lurer på korleis det er gjort, så får du forklaringa her: Hekle ei rad med luftmasker, snu og hekle to fm i kvar lm. Og vips, så blir det slike snurrar! :)

Ha ei riktig god helg alle som er innom bloggen min :)

Diverse sjal.

2010-02-25T17:45:00.009+01:00

Dette er sjal som eg har spunne garn til sjølv. Dei ligg på spinnebloggen min, men fekk lyst til å visa dei i denne bloggen. Her er det fleire som er innom, og eg håper at eg kan vera til litt inspirasjon, slik at fleire får lyst til å prøva seg på spinning. Det er såå kjekt, og det er så mykje flott fiber å spinna av :) Det er jo så mange som strikkar diverse sjal rundt om på bloggane, og alle er så fine. Derfor trur eg det er mange som veit kva desse sjala heiter. Dette er Ishbel.

Dette er Ulmus.

Her er Shetland triangle.

Her er Multnomah.

Og her er endå eit Ishbel sjal. Dersom de vil sjå meir av sjala, og kva fiber eg har brukt osv., så finn de det i spinnebloggen min. Det er link til den øverst i bloggen min.

Litt småting igjen

2010-02-18T17:27:00.003+01:00

Har sett så mange fine smekker rundtom på bloggane, så eg fekk lyst å prøva å strikka nokre eg og. Dei er strikka i rillestrikk, og som de ser, så har eg strikka dei på langs. Har pynta dei med ein elefantknapp.

Her er to par leggvarmarar til litt større barn. Strikka i 50% ull, 30% polyamid, og 20% alpakka. Mjuke og gode. Tinga er lagt ut på Epla. Ynskjer alle ei riktig fin helg :)

Babyting

2010-02-03T19:11:00.003+01:00

At dei var enkle å ta på, men likevel sat godt, var meininga med denne oppskrifta. Derfor starta eg med å strikka glattstrikk så det vart ein rullekant. Deretter strikka eg vrangbord med ei holrad på mitten. I holrada tvinna eg ei snor og tredde i. Her til er det lik oppskrift på vottane og sokkane. Så strikka eg vottane utan tommel, og foten på sokken er vanleg sokkefot. Strikka i Merino babyull på pinne nr. 2,5. Dei blir lagt ut på Epla.

Og vinnarane er...

2010-01-31T13:04:00.005+01:00

No er dagen komen for å kåra vinnarane av utlodninga som eg har her på bloggen. Det er mange som har vore med, og det synest eg er veldig kjekt. Alt har gått rett føre seg, og vinnarane er desse:

Strikkebesta med bloggen Strikkebesta i bloggverda. Ho vann den broderte duken.

Heidi med bloggen Jubel og garnglede. Ho vann eit par hakka gryteklutar.

Trollkåno med bloggen Troll og ting. Ho og vann eit par hakka gryteklutar.

Sender gevinstane så snart eg får adressene. Gratulerer!

Pakke i posten

2010-01-26T17:49:00.004+01:00

Denne nydelege duken fekk eg i posten i går. Saman med den låg eit vakkert kort, ein pakke kaffe, ei vakker pynta eske med post-it lappar, og ei like fin pynta fyrstikkeske. Og sist men ikkje minst, ein sjokolade. Mmmm..

Eg var så heldig å bli ein av vinnarane på Kjersti M sin blogg. Ho har bloggen Mikkje som er vel vert eit besøk. Ho tryllar fram dei nydelegaste putar, dukar og mykje meir. Og dei er heldige dei som får julegaver hos henne :) Det er første gongen eg har vunne på eit blogglotteri, så dette var gøy. Duken pyntar allerede opp i stova. Tusen takk Kjersti :)

Panneband og lommebok

2010-01-17T16:15:00.004+01:00

Her har eg strikka to panneband i rillestrikk. Har hekla ein kant rundt, og pynta dei med litt broderi.

Som de ser her, så blir det smalare bakover. Derfor passar det vel ekstra godt for dei som har hestehale eller oppsett hår. Det blir festa med ein trykknapp.

Så har eg laga to lommebøker i hakking, og pynta dei med litt makrame på glidelåsen.

Glidelåsen har eg sydd i for hand, og eg har hekla den saman frå utsida. Desse tinga har eg lagt ut på Epla.

Litt av kvart

2010-01-03T09:45:00.008+01:00

Eg har nok vore dårleg på oppdatering i det siste, så her kjem diverse ting og tang samla. Som de ser, er eg enno inni småstrikkperioden min, men det har vore kjekt å laga ting som ikkje tek for lang tid. Her har eg strikka lomme med litt broderi til mobilen.

I staden for å fella av og sy den saman, har eg brukt maskesting og maska den av. Det blir eit finare resultat.

Her har eg strikka to nostalgiske smetteskjerf. Kjekke å strikka.

Og her er ein anna type smetteskjerf med hekla kant rundt. Begge typane smetteskjerf er til barn.

Til slutt nokre par med små sokkar som har lagt seg opp ned!

Alle desse småtinga har eg prisa og lagt ut på Epla.

Meld deg gjerne på utlodninga som eg har i innlegget under.

Snart 1-årsjubileum

2009-12-27T12:01:00.005+01:00

Første februar er det ca. eitt år sidan eg starta med blogging, og i den forbindelse loddar eg ut nokre ting som eg har laga. Det har vore eit fantastisk kjekt og inspirerande år, og eg ser fram til eit nytt år med blogging.

Det blir tre gevinstar. Førstepremie blir denne duken som eg har brodert. Andre og tredjepremie blir kvar sitt par med hakka gryteklutar. Framgangsmåten blir slik som dei fleste andre gjer det:
1 lodd: Ein kommentar på dette innlegget.
2 lodd: Ein kommentar + at du er eller blir følgar.
3 lodd: Ein kommentar + at du er følgar, og at du linkar til innlegget.
For dei som ikkje har blogg, men som har lyst til å delta, send meg ein mail, så er du og med på trekninga. Den blir søndag 31. januar.

GOD JUL

2009-12-23T17:55:00.002+01:00

Ønskjer alle ei riktig god jul, og takk for eit koseleg bloggår :)

Ullbukser og juledukar

2009-12-19T15:07:00.008+01:00

Har strikka to ullbukser og brukt to ulike oppskrifter, så dei vart veldig forskjellege. Den eine vart ein smalare type, og den andre vid. Skal leggja dei ut på Epla for sal.

Her er ein juleduk som eg strikka i fjor, og som passar godt på eit glasbord som eg har.

Og her er ein som eg har brodert etter same mønster som kjøkkengardinene som eg har vist før.

Ellers er julesnøen kome her, men det er heldigvis ikkje så mykje. Ha ei fin førjulshelg :)

Engleinnlegg

2009-12-05T16:19:00.007+01:00

Det har vore så mange koselege innlegg med englar rundt om på bloggane, så eg fekk lyst til å visa nokon av mine englar og. Desse strikka eg for nokre år tilbake etter oppskrift i Familien. Koselege å laga. I oppskrifta var dei laga utan pynt, men noko av det kjekkaste var jo å få pynta dei litt.

Kos dykk med pynting til jul, og ha fortsatt ei fin førjulstid :)

Har de forresten høyrt om epla.no? Det er ein ny norsk nettstad der ein kan kjøpa og selgja handlaga produkt, og ein kan laga sin eigen butikk der. Det er ikkje så lenge sidan den starta, men det er allerede mykje fint å få kjøpt. Diverse ting som eg har i bloggen min, har eg no lagt ut i butikken min på epla. Har du lyst til å ta ein titt, så finn du den her.

Førjulskos

2009-11-28T17:01:00.006+01:00

I dag har eg kost meg med diverse forberedelsar til advent. Luciapyntehandkleet er kome på plass. Det kjøpte eg ferdig påteikna for nokre år sidan, og har brodert det.

Så har eg hengt opp kjøkkengardinene. Mønsteret til dei var i Familien for nokon år tilbake, men det var til ein duk. Så eg brukte motiva både til gardiner og ein liten duk.

Og her er den første julebaksten. Kjempegode kaker laga av havregryn. Så vi kan jo sei at dei i alle fall er litt sunne. Har du lyst på oppskrifta så kjem ho her:

Fine havremomser.
100 gram smør
4 dl havregryn
1,5 dl sukker
2 eggekvitar
Smelt smøret, og hell det over havregryn og sukker. Visp kvitane stive, og skjær dei i røra med ein sleikepott. Steik kakene i ca, 8-10 min. ved 175 grader.
Smelt sjokoladen i litt olje, og smør på kvar kake. Eigentleg skal det vera ein mandel til pynt på kvar kake, men av erfaring så ligg mange av dei igjen i kakeboksen, så dei kutta eg ut denne gongen.

Ønskjer alle som er innom bloggen min ei fin adventstid, og tusen takk for alle koselege kommentarar, som eg set stor pris på.

Førjulshelsing frå Bodil.

Meir småstrikk

2009-11-20T18:07:00.004+01:00

Det blir visst berre småstrikk med meg for tida. Her er fleire fargerike vottar, men no i to storleikar.

Desse er str. ca. 4-6 år, og dei sel eg for 75 kr. pr. par.

Og desse er str. ca. 2-3 år, og eg sel dei for 70 kr. pr. par.

Fargerike vottar

2009-11-12T20:37:00.003+01:00

Har strikka desse fargerike vottane i Østlandsgarn. Eg er nok litt usikker på kva størrelse det er, fordi eg ikkje har brukt oppskrift, men eg trur det er ca. 2-3 år. Sel dei for 70 kroner pr. par.

Gryteklutar atter ein gong.

2009-11-06T18:30:00.007+01:00

Så vart det enda nokre gryteklutar i julefargar. Mønstera kjem eg på etter kvart, og det er kjekt å hekla med to fargar samtidig.

Fleire gryteklutar

2009-10-30T17:36:00.004+01:00

Her har eg hekla fire par gryteklutar til i ulike fargekombinasjonar. Dei sel eg for 100 kroner pr. par.

Og eg har strikka eit handkle til. Denne gongen i svart farge. Det er same pris som før: 140 kroner for eitt, og 250 kroner for to.

Gimpa pute

2009-10-20T17:21:00.009+02:00

Kom på at eg hadde ein gimpegaffel som det er lenge sidan eg har brukt. Var spent på om eg hugsa igjen korleis det var. Eg rota litt med det same, men eg trur eg fekk det til. Det kan jo henda at det er fleire måtar å gimpa på og, men dette er slik eg kan det.
Dette er jo ein gamal handarbeidsteknikk som kanskje ikkje blir så mykje brukt lenger, men det skal gå an å kjøpa gimpegaflar i ulik breidde.
Når ein gimpar, så brukar ein ei heklenål saman med gimpegaffelen. Ein legg garnet rundt gimpegaffelen, heklar inni den, og snur gaffelen same veg rundt for kvar omgang. Derfor får ein desse løkkene på sidene. Det er desse løkkene ein brukar når ein heklar saman remsene.

Her prøver eg å visa korleis eg heklar dei saman.

Her ser de ei av lengdene på gimpegaffelen.

Her har eg teke den av, og då ser den slik ut. Eigentleg så snurrar den seg som ein spiral når ein tek den av. Det er ganske fint, så det går nok an å berre gimpa slike lengder, og bruka dei til diverse pynt, på bord, dekorasjonar, pynt på gåver, ja det er vel berre fantasien som set grenser. Som de ser, så har eg brukt eit litt tjukt ullgarn til puten. Dersom eg hadde brukt eit tynnare garn, så ville mønsteret blitt luftigare.

Så har eg hekla tre par gryteklutar til i ulike fargar, men brukt det same mønsteret.

Prisen er som før: 110 kroner pr. par.

Til slutt har eg strikka eit handkle til. Det og har same pris som før: 140 kroner for eitt, og 250 kroner for to.

Gryteklutar

2009-10-13T18:55:00.008+02:00

Å hekla gryteklutar er alltid koseleg syssel. Eg ser og at det er svært populært på bloggane. Her har eg hekla tre par i ulike fargekombinasjonar.

Eg sel alle tre para, og prisen er 110 kroner pr. par.

Så har eg og strikka to handkle til. Same pris som før: 140 kroner for eitt, og 250 kroner for to.